St. Jost und Galgenen

Zusammen mit der Kirche das bedeutenste historische Bauwerk



 

Üsers Joschte-Chapelli

Bescheide stahsch am Strasserand
viel Hektik rund um Dich
und alles schwirret umenand
fascht jedes dänkt a sich.

Z'Dorf wachst und dehnt sich immer uus
und d'Wiese wärdet rar
de Bagger ruumt mit Altem uuf
gar mängs wird z'spaht eim klar.

Du mahnsch üs für ne stille Halt
und ladtsch zum Bsinne ii
Dii Muure sind Jahrhundert alt
en Mänsch cha das nie sy.

Pilgerzüüg vo Oscht und Wescht
händ Dich am Wägrand bsuecht
verfolgt in Not und vo de Pescht
Chraft und Erholig gsuecht.

Viel hundert Jahr sind jetz dur d'Wält
Du stahsch no immer da
d'Urahne händ mit wänig Gäld
viel Sorgfalt zueder gha.

Dii Gschicht isch einzig i de March
erfüllt au üs mit Stolz
gmeinsam sind mir Galgener starch
en Schlag us guetem Holz.



Au mir händ Stunde det verbracht
uf knorrig härte Bänke
by Rosechranz und Maiandacht
viel gar bym Ja-Wort schänke.

Jetz bruuchsch Du dringend fliissig Händ
wo dinne schaffet und tüend male

d’Altär und Bilder a de Wänd
die söllet nüü erstrahle.

So stahsch Du au i hundert Jahr
üs Galgener trüü zur Siite
Sankt Joscht beschütz’ üs vo de Gfahr
au duur bewegti Ziite...

Toni Rü